Apr 222011
ಸಕ್ಕರೆಸವಿಯನು ಪೂರ್ವಾಶ್ರಮದಲಿ
ಯಕ್ಕರೆಸೂಸುತ ತವರಿಗೆ ನೀಡಲು
ಉಕ್ಕಿದ ಅಮ್ಮನ ಪ್ರೀತಿಗೆ ನೀನೇ ಪೂರಣೆಯಾಗಿರುವೆ |
ಬಿಕ್ಕುತಯೊಳಗಡಿಯಿರಿಸುತ ನಲ್ಮೆಯ-
ಸಿಕ್ಕಲಿ ಸಿಲುಕಿಸಲೆಮ್ಮಯ ಮನಗಳ
ಹೊಕ್ಕುತಲಣ್ಣನ ಹೃದಯವ ನೀನೇ ವಿಜಯವ ಪಡೆದಿರುವೆ ||
(*ಅತ್ತಿಗೆ – ಅನ್ನಪೂರ್ಣೆ, ಅಣ್ಣ – ವಿಜಯ)
-ರಜನೀಶ
ರಜನೀಶ – ಬಹಳ ಚೆನ್ನಾಗಿದೆ. ಇನ್ನೂ ಒಂದೆರಡು ಪದ್ಯಗಳನ್ನು ಇದೇ ಜಾಡಿನಲ್ಲಿ ಸೇರಿಸಬಹುದು ಅನ್ನಿಸುತ್ತದೆ
ರಾಮಚಂದ್ರ – ಧನ್ಯವಾದಗಳು. ಪದ್ಯವನ್ನುಬೆಳೆಸಲು ಪ್ರಯತ್ನಿಸುವೆ.
ಚೊಕ್ಕವೆ ಪದ್ಯವದೆರಡನೆಸಾಲಲಿ
ಚಿಕ್ಕಲಘುಬೆರೆಯೆ "ತವರಿಗೆ ನೀಡಲು"
ಮಿಕ್ಕವು ಸರಿಯಿದೆ ರಜನೀಶರೆ ಭಾವಕ್ಕಿದೆ ಬಲಸೆಳೆತ
ರಜನೀಶ,
ಬಹಳ ಚೆನ್ನಾಗಿದೆ :).
ಒಂದಂಶವನ್ನು ನೀವು ಮುಂದಿನ ಪದ್ಯಗಳಲ್ಲಿ ಗಮನಿಸಕೊಳ್ಳಬಹುದು ಎಂದು ನನ್ನ ಅನಿಸಿಕೆ. ಸಂಧಿಯಾಗುವ ಕಡೆಯೆಲ್ಲ ಸಂಧಿ ಮಾಡಿದರೆ ಇನ್ನು ಸೊಗಸಿರುತ್ತದೆ.
ಉದಾ:
ಉಕ್ಕಿದ ಅಮ್ಮನ -> ಉಕ್ಕಿದಮ್ಮನ
ಸಿಲುಕಿಸಿ ಎಮ್ಮಯ -> ಸಿಲುಕಿಸೆಮ್ಮಯ
ಹೊಕ್ಕುತ ಅಣ್ಣನ -> ಹೊಕ್ಕುತಣ್ಣನ
ಮತ್ತು ಈರೀತಿ ಸಂಧಿ ಮಾಡಿದ ಮೇಲೆ. ಛಂದೋಗತಿ ಗಮನಿಸಬೇಕಾಗುತ್ತದೆ
ರಜನೀಶ – ಅದ್ಭುತವಾದ ಸಾಲುಗಳು….ನಿನ್ನ ಅಭಿಮಾನಪೂರ್ವಕ ಶುಭಾಶಯಕ್ಕೆ ನಮ್ಮ ಹೃದಯಪೂರ್ವಕ ವಂದನೆಗಳು…