ಪದ್ಯಸಪ್ತಾಹ ೩೨೪: ವರ್ಣನೆ

  6 Responses to “ಪದ್ಯಸಪ್ತಾಹ ೩೨೪: ವರ್ಣನೆ”

1. 

   ಮಂಜ says:

   September 13, 2018 at 5:31 pm

   ದೇಹದ ಪರಿವೆಯುಮಿಲ್ಲದೆ
   ಮೋಹವಿಹೀನಂ ಪದಂಗಳಂ ಘಾತಿಸೆ ಮ
   ನ್ಮೋಹಕಸುತ-ವಿಘ್ನೇಶ್ವರ
   ವಾಹನಮೊಂದಲ್ಲಿ ಸಿಲ್ಕದಿರಲಕಟಕಟಾ!
   ದೇಹದ ಪರಿವೆಯೇ ಇಲ್ಲದೆ ಶಿವನು ತಾಂಡವದಲ್ಲಿ ಪಾದಗಳನ್ನು ನೆಲಕ್ಕೆ ಘಟ್ಟಿಸುವಾಗ ಪಾರ್ವತಿ ತನ್ನ ಪ್ರಿಯಪುತ್ರ ಗಣೇಶನ ವಾಹನವು ಅವನ ಕಾಲುಗಳಿಗೆ ಸಿಲುಕದಿರಲಿ ಎಂದುಕೊಳ್ಳುತ್ತಾಳೆ.

   Reply
2. 

   ಹಾದಿರಂಪ says:

   September 14, 2018 at 3:30 pm

   ಶ್ರೀ ನೀಲಕಂಠಕುಲಕರ್ಣಿಯವರ ಪದ್ಯಗಳು (From fb)
   ಗುಡಿಸಲ ಗುಟ್ಟು: ಭಿಕ್ಷಾನ್ನ, ಬಿಳಲು ಬಿದ್ದ ಜಡೆ, ಕರಿದೊಗಲುಡುಗೆ, ಬೂದಿಬಡಿದ ಮೈ ಇವೆಲ್ಲ ಜಗತ್ತಿಗೆ ತಿಳಿದಿದ್ದರೂ ಗೌರಿ ಇವನರ್ಧಶರೀರವನ್ನು ಹೊಂದಿದಾಗ ಆ ಬಡವ ಶಿವನ ಗುಡಿಸಲಿನ ಗುಟ್ಟು ರಟ್ಟಾಯಿತು – ಅಲ್ಲಿ ಇಬ್ಬರು ಮಲಗಲೂ ಜಾಗವಿಲ್ಲವೆಂಬುದು!
   ಚಂಪಕಮಾಲೆ|| ತಿರುಪೆಯನೆತ್ತಿ ತಿಂಬ ಪರಿ, ಎಣ್ಣೆಯನುಣ್ಣದ ಕೂಂದಲೊಡ್ಡವಂ
   ಕರಿದೊಗಲುಟ್ಟು ಸುಟ್ಟೆಡೆಯ ಬೂದಿಯ ಮೆತ್ತಿದ ಮೈ ಇದೆಲ್ಲಮಂ
   ಧರೆಯರಿತಿರ್ದುಮಂಬೆ ತನುವರ್ಧವನೊಂದೆ ಕುಟೀರಹಸ್ಯಮಿ-
   ನ್ನಿರದವೊಲಾದುದಿರ್ವರೊರಗಲ್ಕಿರದಿರ್ಪನಿತೊಂದು ತಾವಮುಂ!
   ——-
   ಶಿವನ ತಾಂಡವಕ್ಕೆ ಪಾರ್ವತಿಯ ಪ್ರತಿಕ್ರಿಯೆ: ಹಾಲಾಹಲದಿಂದಾಗಿ ನೀಲಕಂಠ ಎನಿಸಿಕೊಂಡದ್ದರಲ್ಲಿ ಏನು ಭಾಗ್ಯವಿದೆ?! ಇಂದು ತನ್ನ ಜಟೆಗಳೆಂಬ ಮೋಡಗಳನ್ನು ನೋಡಿ ನೀಲಕಂಠದಂತೆ (ನವಿಲಿನಂತೆ) ನರ್ತನ ಮಾಡಿದ್ದು ಲೀಲೆಯಾಯ್ತು!
   ರಥೋದ್ಧತ|| ಕಾಲಕೂಟಗರವೀರ್ದ ಕಾಲದಿಂ
   ನೀಲಕಂಠನೆನಿಸಿರ್ಪ ಭಾಗ್ಯಮೇಂ?!
   ಲೀಲೆಯಯ್ ನಿಜಜಟಾಬ್ದವೀಕ್ಷೆಯಿಂ
   ನೀಲಕಂಠಸಮನೃತ್ಯವಾಡಿದಂ!

   Reply
   • 

     ನೀಲಕಂಠ says:

     September 17, 2018 at 3:32 pm

     ಹಂಚಿದ್ದಕ್ಕೆ ಧನ್ಯವಾದಗಳು! ಆದರೆ ಇದೇನು, ನಾನಿಷ್ಟು ದಿನ ಇತ್ತಕಡೆ ಸುಳಿದಿಲ್ಲವಾದ ಮಾತ್ರಕ್ಕೆ ನನಗೆ ಶ್ರೀಕಾರ ಓಂಕಾರಗಳ ಹಾಹಾಕಾರವೆಬ್ಬಿಸಿಬಿಟ್ಟಿದ್ದೀರಿ!

     Reply
     • 

       ಹಾದಿರಂಪ says:

       September 23, 2018 at 10:35 pm

       ಈಗಳೆಲ್ಲ ಮಠಾಧಿಪತಿಯಾಗುವುದು ಸರ್ವವಿಧದಲ್ಲೂ ಪ್ರಯೋಜನಕಾರಿಯಲ್ಲವೆ? ಒಂದು ಶ್ರೀ ಸಾಲದೇನೋ! ಶ್ರೀಶ್ರೀಶ್ರೀ ಎನ್ನಲೆ. ಆನುಷಂಗಿಕವಾಗಿ ಒಂದು ಅಲೋಚನೆ ಮೂಡಿದೆ. ಅಭಿಜಾತಕಾವ್ಯಗಳಲ್ಲಿ ’ಮಠ’ವೆಂದರೆ ಗುರುಕುಲವಲ್ಲವೆ? ಈಚೆಗೆ, ಮಠವೆಂದರೆ ಏನೇನೋ ಅರ್ಥ! ಆಗ ಇದ್ದುದು ಬರಿಯ ಋಷ್ಯಾಶ್ರಮಗಳು.

       Reply
   • 

     ಅನಂತಕೃಷ್ಣ says:

     September 18, 2018 at 8:50 pm

     ನೀವು ಅಸಾಧ್ಯರೇ ಸರಿ. ಭಗೀರಥ ಬರಿಯ ಗಂಗೆಯನ್ನು ಭೂಮಿಗರಳೆತಂದರೆ ನೀವು ಕಾವ್ಯಗಂಗಾಸಮೇತರಾದ ಗಂಗಾಧರ(ನೀಲಕಂಠ)ರನ್ನೇ ಪದ್ಯಪಾನಕ್ಕೆ ಎಳೆತಂದಿದ್ದೀರ _/\_

     Reply
3. 

   ಹಾದಿರಂಪ says:

   September 23, 2018 at 10:16 pm

   ಮುಸುಕಿನ ಜೋಳ – ಬಿ.ಜಿ.ಎಲ್. ಸ್ವಾಮಿಯವರ ಶಾಸ್ತ್ರವಿಚಾರದ ಪದ್ಯರೂಪ:

   ಗಂಡುಪೂಗೊಂಚಲದು ಪಿಂಛಶಿಖದೊಲ್ ಕೊನರಿ
   ಕಾಂಡಾಗ್ರಭಾಗದಿಂ ಕೆದರಿರ್ಪುದು|
   ಕಾಂಡದೆಲೆಪರ್ವಕೋನದೊಳುಂಟು ಪೆಣ್ಪೂವ
   ಜೊಂಡವೊಲ್ ರೇಣುವಾಹಿಯ ರಾಜಿಯುಂ||

   ಘಾತಿಸಲ್ ಗಾಳಿಯದು, ಮಕರಂದವುದುರಲಾ-
   ಧೂತರೇಣುಕಣವೆಲ್ಲವು ಮೊಳೆಯುತುಂ| (ಆಧೂತ=ತೂಗಾಡುವ)
   ರೇತಸ್ಸು ಗರ್ಭಾಶಯದೊಳಿರ್ಪ ತತ್ತಿಯಂ
   ಚೈತನ್ಯವಾಗಿಸಲು ಕಾಳಾದುದೈ||

   Reply